Посета на Нова Градишка: Споменик на Тоше; средба со потенцијални инвеститори

Градоначалникот на општина Крушево Томе Христоски присуствуваше на свечено откривање на споменик на пејачот Тоше Проески во Нова Градишка, Хрватска.

Загинувањето на Проески на патот кон Нова Градишка, Хрватска ја направи оваа општина уште поприврзана кон музичката ѕвезда. Откриен е споменик во негова чест, а соработката меѓу општина Крушево и Нова Градишка се интензивира на полето на промоција и зачувување на ликот и делот на балканската поп икона.

„ Денес во паркот на познатите во Нова Градишка, Р.Хрватска заедно со градоначалникот Винко Гргиќ , Амбасадорот во Р.Хрватска г-дин Милаим Фетаи откриено е спомен обележјето на Тодор Тоше Проески. Тоше вечно ќе живее во нашите срца и должни сме да оддаваме почит на овој и многу други начини. Тоше соединуваше народи и тоа е очигледно од оваа постојана комуникација со Нова Градишка. Слава му!“, изјави градоначалникот на општина Крушево.

Посетата на Нова Градишка содржеше и состаноци и средби за проширување на соработката меѓу овие две општини. Договорена е соработка која ќе придонесе за зацврстување на односите меѓу општините.

„ Договоривме идна интензивна и конкретна соработка во повеќе области која ќе придонесе до зацврстување на односите помеѓу двете пријателски општини. Во Нова Градишка ја искористивме можноста за разговор со инвеститори кои беа во посета на Нова Градишка, Р.Хрватска, на кои им беа презентирани можности и услови за инвестиции од областите на незагадувачка индустрија во општина Крушево.“, потенцира Христоски.