Фестивалот во Фунар (Funar Fest 2026) го означи почетокот на втората фаза од проектот „Крушево и Елбасан, Патување во природа и авантура“ (KET-J), кој се реализира во рамките на ИПА III Програмата за прекугранична соработка Северна Македонија, Албанија.
Настанот во Фунар, Елбасан, собра посетители од Елбасан, други градови во Албанија, како и меѓународни туристи, нудејќи богата програма со културни активности, презентација на локални производи, музички настапи, кајакарење, кампување и активности на отворено. Преку настанот, Фунар беше промовиран како атрактивна дестинација за природен и авантуристички туризам.
Втората фаза од проектот вклучува изградба на Авантуристичкиот парк Фунар, уредување на нови паркинг простори, како и развој на 13 километри пешачки и велосипедски патеки. Овие инвестиции ќе придонесат за подобрување на туристичката инфраструктура, зголемување на атрактивноста на регионот и развој на одржлив туризам.
На настанот присуствуваа претставници на локалните власти и партнерските организации, при што градоначалниците на Општина Елбасан и Општина Крушево ја истакнаа важноста на прекуграничната соработка и поддршката од Европската Унија за заеднички развој на туристички потенцијали, создавање нови економски можности и поврзување на заедниците од двете страни на границата.
Преку развој на туристичка инфраструктура, јакнење на локалните капацитети и промоција на природните ресурси, проектот има за цел да ги позиционира Крушево и Елбасан како препознатливи дестинации за активен, природен и авантуристички туризам.
Проектот е финансиран од Европската Унија преку ИПА III Програмата за прекугранична соработка Северна Македонија, Албанија.
