Општина Крушево, Општина Елбасан, Центарот за одржлив развој АЛКА и организацијата Tjeter Vision официјално го потпишаа Партнерскиот договор за имплементација на проектот „Крушево и Елбасан, Патување во природа и авантура“.
Проектот е финансиран од Европската Унија преку ИПА III Програмата за прекугранична соработка Северна Македонија, Албанија и има за цел да го поттикне развојот на одржливиот и авантуристичкиот туризам, да ја подобри туристичката инфраструктура и да ја зајакне прекуграничната соработка помеѓу двата региони.
Во рамките на проектот ќе бидат реализирани значајни инфраструктурни инвестиции, меѓу кои:
• Изградба на безбедно и пристапно полетувалиште за параглајдерство во Крушево.
• Унапредување на Спортско рекреативниот центар Гумење со нови пешачки патеки, ЛЕД осветлување, реконструкција на спортските терени и простор за организирање настани и фестивали.
• Изградба на авантуристички парк во Фунар, Елбасан, со паркинг простор и обележани патеки до кањоните Допај.
Проектот предвидува и активности за развој на локалните капацитети преку обуки за туристички оператори и локални претприемачи за одржлив туризам, циркуларна економија и примена на практики со минимално создавање отпад. Истовремено ќе биде воспоставена прекугранична мрежа на туристички чинители за заедничка соработка, размена на искуства и развој на нови туристички производи.
Преку регионални и меѓународни промотивни активности, проектот ќе придонесе за зголемена препознатливост на Крушево и Елбасан како атрактивни дестинации за авантуристички и активен туризам.
Со потпишувањето на Партнерскиот договор започнува реализацијата на заедничка иницијатива која ќе придонесе за одржлив економски развој, подобра туристичка понуда и посилни врски помеѓу локалните заедници од Северна Македонија и Албанија.
