ПРЕС КОНФЕРЕНЦИЈА НА ГРАДОНАЧАЛНИКОТ ОПШТИНА КРУШЕВО ЗА ПРОЕКТИ ВО 2015г.

Градоначалникот на општина Крушево, Ѓорги Дамчески денес одржа прес конференција на која беа презентирани дел од проектите кои моментално се реализираат и ќе се реализираат во иднина од страна на локалната самоуправа.

„За оваа година приоритет на локалната самоуправа е подобрување на патната инфраструктура во градот и другите населени места.

Ова се наметна поради значително нивно оштетување од временските неприлики, обилните врнежи и долготрајната зима.

Исто така приоритет е подобрување на водоснабдувањето – изградба на нови цефководи, реконструкција на секундарната водоводна мрежа во должина од 15км како и поставување водомери во населените места.

Пред да ги објаснам подоробно проектите сакам да потенцирам дека е започната реконструкција на регионален пат Крушево – Демир Хисар која беше значително оштетен и е од огромно значење за развој на туризмот во Крушево.“ – рече Градоначалникот Дамчески.

Тој исто така ги наброи проектите кои ќе отпочнат со реализација со подобрувањето на временските прилики:

– во завршна фаза е реализацијата на проектот за рехабилитација на локалниот пат Кривогаштани-Бучин во должина од 7,2км во вредност од 430 илјади евра – средства обезбедени од Светска Банка и Европска Инвестициона Банка.

– отпочната е рехабилитација на регионалниот пат Крушево-Сладуево-Демир Хисар.Во 2015г. за овој проект ќе се потрошат 7 милиони денари – средства обезбедени од Министерство за транспорт и врски и ЈП за патишта.

– во тек е реализација на проектот за изградба на цефковод од регионален водовод Студенчица-пумпна станица с. Норово кон с.Бучин, во должина од 9,5км  и вредност од 18 милиони денари од кои 14 милиони денари се обезбедени од Агенцијата за поддршка на земјоделството и руралниот развој додека 4 милиони денари ќе ги обезбеди локалната самоуправа.

– во с.Норово и с.Алданци се реализира проектот за поставување на водомери на јавна површина и изградба на шахти по сите стандарди во вредност од 80 илјади евра – средства обезбедени со поволен кредит од Светска Банка.

Исто така во престојнава година  ќе се уредува централното градско подрачје каде ќе се уреди и детско катче како и уредување на тротоарите по крушевските скали, заврши Градоначаникот.