Јавното претпријатие „Комуна“ денес, 07.02.2018, е во населените места Алданци и Норово каде што се чистат одводните канали како превенција од можни поројни дождови и предизвикување поплави.

Претходно, „Комуна“ работеше на пределот во селата Саждево и Јакреново каде што исто така после неколку години се изврши чистење на каналите.

Денес, 24.01.2018 година, во населените места Саждево и Јакреново, Општина Крушево се извршува чистење на каналите, а Градоначалникот на Општина Крушево Томе Христоски и в.д. директорот на ЈП „Комуна“ Наум Илиески се на терен заедно со вработените кои го извршуват чистењето.

Градоначалникот Христоски најави дека сите канали во населените места ќе бидат исчистени каналите и тоа ќе се практикува секоја година.

„Денес сме во Саждево и Јакреново и тука ќе ја завршиме работата, а другите населени места во општината нема да бидат изоставени и секаде ќе се исчистат каналите“, порача Градоначалникот на општина Крушево.

Градоначалникот на Општина Крушево Томе Христоски и в.д директорот на ЈП „Комуна“ Наум Илиески утрово беа во посета на градскиот пазар и пазарџиите.

По средбата Градоначалникот изјави дека во иднина локалната самоуправа активно ќе работи на овозможување на услови за зголемување на луѓето кои продаваат овошје и зеленчук, а исто така цената за користење на простор во пазарот ќе биде значително намалена.

Со тоа, вели Градоначалникот Христоски, ќе се зголеми бројот на пазарџии кои ги плаќаат услугите од зградата на пазарот доделени од страна на „Комуна“ и, истовремено, ќе се намали бројот на „диви“ продавачи.

„Ќе поднесеме иницијатива до Советот на Општина Крушево цената за користење на простор во пазарот да се намали драстично и со тоа да овозможиме простор за повеќе пазарџии и поголем пазар“, порача Христоски.

Градоначалникот на Општина Крушево Томе Христоски на сите православни христијански верници им ги честита Божиќните празници и посакува овие денови да донесат мир, благосостојба, здравје до крајот на годината.

„Во мое име и во име на вработените во локалната самоуправа Ви ги честитем Божиќните празници и Ви посакувам овие денови да Ви донесат мир, благосостојба и здравје кои ќе продолжат и понатаму, до крајот на годината. Ви посакувам успех и среќа за Вашите најблиски, празниците да донесат мир и разбирање меѓу луѓето. За многу години“, порача Градоначалникот Христоски.

Продолжува рокот за легализација на бесправно изградените објекти (дивоградби).

За оние што веќе поднеле барање потребно е да поднесат уште еднаш барање и комплетна документација заедно со елаборат до одделението за урабнизам на локалната самоуправа во Крушево, најкасно до крајот на јуни месец 2018-та година.

За оние кои досега немаат поднесено барање да ги достават истите документи претходно наведени со таа разлика што рокот за новите баратели е до крајот на 2018-та година.

Причината зошто дел од доставените барања се одбиени е заради недостатокот од елаборати.

Исто така и оние кои побарале легализација на бесправно изградени објекти во 2016 година рокот за доставување на елаборати се продолжува до крајот на јуни месец 2018-та година.

Драги сограѓани,

Вработените во Општина Крушево и Градоначалникот Томе Христоски Ви ја честитаат Новата година со желби за здравје, среќа, љубов и многу успех.

Во Новата 2018-та година Ви посакуваме се најдобро за Вас, Вашите семејства и фамилии.

Градоначалникот Христоски честитајќи ја Нова година на сограѓаните посака успех и развој за Крушево.

„Во Новата година покрај среќата и здравјето за моите драги сограѓани од Општина Крушево сакам да им посакам успех и развој за Крушево кој сите заедно ќе го постигнеме. Само заеднички наредната Нова година ќе ја дочекаме уште поуспешни од сега“, изјави Градоначалникот на Општина Крушево.

Вчера, 26-ти декември 2017, во Домот на културата „Наум Наумовски Борче“ се одржа дебата со младите за предлог-буџетот за 2018 година на која покрај присутните млади збор зедоа Градоначалникот на Општина Крушево Томе Христоски, претседателот на Советот на Крушево Тома Петроски, лицето за контакт со млади Сотир Габелоски и претставник на Finance Think Благој Ѓелевски.

Претседателот на Советот Тома Петроски порача дека предлог-буџетот за 2018 предвидува повеќе пари за туризмот, барање на извори на вода и спорт.

„За наредната година планираме милион и 60 илјади денари за развој на туризмот, додека за 2107 оваа ставка изнесувала 260 000 денари. За 2018 година за нови извори на вода предвидуваме 2 и пол милиони повеќе во споредба со 2017. Исто така и за спортот предвидуваме нешто над 2 милиони денари“, потенцира Петроски.

Градоначалникот Христоски изјави дека иако предлог-буџетот за 2018 година е помал од оној за 2017 сепак е развоен и најави дека Крушево го очекува градежна експанзија од пролет 2018 година.

„Буџетот е развоен. И покрај кредитите кои треба да се враќаат немаме намера да кратиме и да штедиме кога се работи за проблемите на граѓаните. Најавувам дека од на пролет започнуваме со градежни зафати на ниво на Општина Крушево“, изјави Градоначалникот Христоски.

Претставникот на Finance Think го претстави проектот финансиран од УСАИД „Мои пари – моја одговорност“ кој директно го вклучува Крушево и организирањето на дебати и форуми за креирање на граѓански буџетот, а со цел целосна транспарентност при трошењето на парите на граѓаните.

Вработеното лице во Општина Крушево за комуникација со млади Сотир Габелоски се осврна на проектите кои директно ги таргетираат младите.

„За реконструкција на спортската сала се предвидуваат 480 000 евра пари на Европската Унија, за реконструкција на горната училишна зграда од Агенцијата за поддршка на земјоделството и рурален развој обезбедени се 15 милиони денари и учество на Општина Крушево со 3 милиони денари. Исто така, очекуваме одобрување на проектот за изградба на училиште во село Саждево“, изјави Габелоски.

На дебатата присуствуваа претставници на Локалниот младински совет и претставници на проектот на Младински Сојуз – Крушево „Youth Friendly City“.

Градоначалникот на Општина Крушево на социјалните мрежи најави дека почнувајќи од денеска заедно со в.д. директорот на јавното претпријатие „Комуна“ Наум Илиески активно ќе работат на решавање на проблемот со водоснабдувањето и барање на алтернативни извори на вода.

Општината особено во летниот период се соочува со недостаток од вода, но и, како што најави Градоначалникот на Крушево, ќе се бараат можности за намалување на огромната потрошувачка на струја при испумпување на вода од пумпната станица во село Норово.

„Од утре и во наредниот период во соработка со В.Д.Директорот Наум Илиески и вработените на ЈП “Комуна” Крушево започнуваме со барање на алтернативни извори на вода за пиење за град Крушево, и барање можности за надминување на проблемот со недостаток на водоснабдување на градот во екот на туристичката сезона од изворот “Студенчица”, со тоа и намалување на огромниот трошок за струја кој се прави на пумпната станица во с.Норово.“, напиша Градоначалникот Христоски на социјалната мрежа „Фејсбујк“.

Општина Крушево ги објавува завршните сметки за 2016 година.

Завршните сметки можете да ги најдете на следниот линк.

Во текот на вчерашниот ден (недела, 17, 12. 2017) беше отклонет еден дефект со водоснабдувањет во населеното место Борино, Општина Крушево, а денес се работи на уште еден дефект во ова село.

Градоначалникот на Општина Крушево Томе Христоски потенцира дека добил известување од граѓани за проблеми со водоснабдувањето и во консултација со ВД директорот на ЈП „Комуна“ Наум Илиески се упатиле во Борино.

„Едниот проблем е отклонет, додека во понеделник ќе се отклони и другиот проблем“, ги информира Градоначалникот Христоски граѓаните од ова населено место преку социјалните мрежи.

Службите на „Комуна“ денес се повторно на терен и работат на решавање на проблемот со водоснабдувањето во Борино.